الطبل في ((عدن)) .. والشرح في ((الرياض)) ..!

عندنا في لحج .. مثل لحجي يقول : ((الطبل في الحوطة والشرح في سفيان )).. على ما تقولوا : (على ريحة المرق فتوّا) .. بس في عدن .. القضية تختلف .. فالحال  اللي وصلت اليه وأهلها .. تخلينا نقلب المثل اللحجي حقنا ونقول : (الطبل في عدن والشرح في الرياض) – معناته: (التعب لاهل عدن .. والراحة للشرعية) .. الرئيس وحكومته في الرياض .. في (اخر منجهة) وطارحين رجل فوق رجل .. وامورهم سابرة والمواطن في عدن .. اللي يسموّها – زوراً و بهاتاناً – (العاصمة المؤقتة) خلوّه يوكل من (الكدّافة) – ومن صدق .. هنوك ناس في عدن يوكلوا من الكداديف ومن براميل  القمامة – خلوّه يذوق المر من مأساة (الكرهبة) .. ساعة لاصي وخمس ساعات طافي .. نعيش في العصر الحجري ..

شوه هذا الشمات  وشوه هذا العزار .. خلوّه يجيب الماي فوق ظهره او فوق (جاري جمل ) او (جاري حمار) .. اما (المشاهرة) اسكت سكتة.. تجيك بعد شق الانفس .. بعد ثلاثة او خمسة شهور .. وقدك مدّين على عدة شعر راسك .. اما البترول اصبح كما (البيمة) انته وحظك .. وبالله عليكم يا ناس منوه يصدّق .. ان نص (اهل عدن) – ومثلهم في الجنوب – أمراض بالسكري والقلب والضغط والفشل الكلوي والرئوي والسرطان – والعياذ بالله- والحكومة الامور عندها عادي ..

خليّ الشعب وابوه .. وابو ابوه .. وعزّ ما عنده .. يموت ويروح في ستين داهية .. ماشي يهمها .. (خليك بس مع الرياض ..الطبل في (عدن ) والشرح في (الرياض ) ..

ياناس عدن منهارة ..عيب عليكم .. ومدمرة حتى العظم ..في كل المجالات .. والخدمات فيها وصلت الى صفر في صفرين ..والفساد غالط نفسك بس ..ماشي  عاد في عدن حاجة تسلّي على القلب والخاطر .. حتى التفاهم بين الناس اصبح بالبندق .. والمناطقية والقبلية زادت  .. هذا (بدوي) وهذا (ضالعي) .. وهذا (يافعي) وهذا (حضرمي) .. لا وين نحنا بنهب .. الله المستعان .. وين (التصالح والتسامح) .. وين (علي ناصر) ووين( البيض والجفري والعطاس) ..

الله المستعان ويا لوماه عليكم.. معانا (رئيس حكومة) ووزراء .. هشتي كما (الجبرت) .. لا يهشوا ولا ينشوا .. من حقون (باولة وبيستين) من يوم ما قعوا وزراء .. ولا حلوّا لمواطن مشكلة .. البلاد كلها اصبحت (بوكو حلال) وتسير لا (قفا) .. جلوس احرار وطلقاء ومفتهنين في (الرياض) ولمّا يجوا عدن يصبحوا (محابيس ) في معاشيق .. ماشي يقدرّوا يخرجوا حتى شبر .. ولا حتى لا عند (سينما بلقيس) ..

يا عيباه ويا خزاتاه .. كيف بالله عليكم ذولا بايديروا بلادهم فجاعى من فايتهم..؟

اتصل بي هذا الاسبوع عدد من اهالي  واسر عدن .. وقالوا : (خلاص نحنا تعبنا وشكعنا من هذي الحياة .. لا كرهبة كما الناس.. ولا ماي .. ولا مشاهرات .. والبترول على (ضربة الفال) .. اما الاسعار كل واحد يبيع على كيفه .. ومنوه با ينصفنا ..؟ الرئيس عبدربه ورئيس الحكومة (بن دغر) يجلسوا يومين في عدن وشهور في السعودية – ناقصهم القميص والعقال- وبايقعوا سعوديين زادي على السعوديين .. ما شاء الله عليهم .. ارتاحوا وسمنوا وبيضّوا – يمكن يتملسوا بزيت الزيتون – والله يعلم كيف النهاية .. وشوه بعد هذا الشبع ..؟ وانته يا شعب موت طز فيك وفي جدات جداتك ..

سلام الله على ايام الحزب .. كان كل شي رخيص .. والكرهبة لاصي صبح مع ليل ولا تطفي بتات .. وماشي كنا نعرف حاجة اسمها (مواطير ولا فرافير .. ولا شفاط ولا شفافيط ).. والماي كان يطلع لما اخر تابق في العمارة .. والبترول عمر امه ما اقتطع .. اما المشاهرة كانوا يعطوك اياها في (بنكس) كل شهر بشهره .. حتى وان كانت (باولة وبيستين ) بس كانت فيها البركة .. تشم عرفها (بيس) من صدق .. ماشي كما (ريال باب اليمن) .. عرفه (حلبة) .. والدينار حقنا كنت تشتري به السوق بكله .. والباقي عاده يزيد .. حتى الزواج كان بمية دينار – يعني الفين شلن على ما تقولوا .. (الفين وسمتية ريال يمني) كانت تجيب (انسانه عروسة) مع الحناء والبخور .. وتمسي عروس وفوق راسك عمامة عبدلية مركوزة ..

وين هبت ذيك الايام .. جتنا (وحدة العصيد والسحاوق ) عصدت امهاتنا عصيد  ودقوا عدن  لا العظم – انتهت اتصالات الاهالي ..))

نقول للرئيس هادي : خلاص كفاية .. لا هنا وبس .. الشعب قده بغران .. يا تنتبهوا لعدن واهلها – كما تنبهتوا لمأرب – خلوّا الناس يقرروا مصيرهم من نفوسهم .. لأنه ماشي يقع ((الطبل في عدن والشرح في الرياض)) .. عدن تحتاج الى حضور فاعل للشرعية .. وتصحيح الاوضاع فيها .. والحليم تكفيه الاشارة ..!