رقَـــع بطنـك.. وما عليـك من الفسو!!؟؟

اللقمة الطيبة) قبل كل شيء والا ما ع بقي لنا شيء.. كما قال الزيدي : الحمد لله حمداً بقبقي.. لا شبعنا ولا عيشاً بقي. !! ازنه كان على حج. !! فاحياناً يكون الخبز قبل الحب على عكس قول الشعراء.. لازم الواحد يرقع البطن.. كان في واحد تنزاني فك مطعم صغير للشاي قدام مقهى سكران بشارع السبيل، كريتر، بس كان مبتكر ويعرف كيف يصيد البيسة بشطارة.. مدريش فين ضاعت مني صورته.. كان يعمل مطبق من بعد ظهر كل يوم وطوال وقت العصرية عشان العواف.. ومع المطبق يجهز اطباق اللوبيا اللي هي الدجرة زيما نقول.. والمطبق الحامي يتقرمش.. ومع الدجرة ياسلام سلم وما عليكم من الفسو.. 

في واحد تاني قبله يعمل صمبرة جرم على الكيف على طريق غاندي الرايح الى الخساف.. كنا نجي له من الشيخ عثمان.. وفي ناس حتى من اهل البريقة يجو الى عنده.. كل يوم من بعد الظهر وطوال العصر يجهز دست ابو الدسوت من الصمبرة التي هي من اجود انواع العتر البلدي.. والجرم كلمة بينياني معناها حامي اي ساخن.. يعني عتر حامي.. كنا من الزحمة عنده نجلس فوق الحديد اللي كان حاجز للطريق قدام محل الصمبرة جرم.. كان يقدم طبق مليان بالعتر الساخن المكشن المحوج.. ويملأ الطبق بالكشمبر المشبع بالطماطم والبصل والثوم والبسباس الاخضر اللي يشعط شعيط.. واللي يشتي كمان لتعزيز العواف، يطلب ربع قرص روتي من ابو صندوق اللي كان القرص الواحد منه يتقسم الى ارباع. !! وبعدين عليكم وعلى الشاهي العدني الملبن، واللي يشتي بعد الشاي يضرب حبتين تمبل من حق بنارسي اللي بداخلها فوفل فضي من طراز مخصوص... وبس. يجزع الوقت بعدين لغاية العشاء وتتهيأ المعدة للمزيد من البليع ويجي وقت العشاء.. 

معانا العزيز بالو آخر العنقود مع الكباب اللي هو في الاساس كفتة بالمصري.. اما لحم الشاب اللي هو الكباب الحقيقي.. او لحم الاوصال كما يسميه ناس الزمن الحالي فلا عاد كان الله منه ولا من اوصال الكبدة على الجمر كما في الزمان الاول.. وكذا.. في مطعم صغير بالركن قدام زكو يسموه مطعم السكارى يفتح لغاية اخر الليل الى قريب الفجر.. يقلب وجبات من يد الطباخ"القمري" المتمرس في مطاعم النمر الغابرة اللي كانت قدام المجمع الصحي وبناجل عبده حسين الادهل. !!

  وبس.. حتى النوم ياجماعة الخير يجي صافي وراوي لما الواحد يرقع المعدة باللقمة النظيفة الطيبة. !!

  تحزوا ايش الحكاية اللي تخلينا ذي الايام نازل بمنشورات الاكل والبليع. ؟؟ السبب والله يا اصحابي هي انه نفسي مسدودة من الاكل ولا عاد أاكل الا بصعوبة بسبب الحر ونكد الدنيا.. عشان كده اعوض الاكل بالمنشورات والتصاوير.. واتمنى لكم شهية طيبة... جود ابيتيت بالانجليزي