خمبقات في مخبازة..!!

(خمبقات) لما كنا نتدلع ونعزم على اكل مخبازة سمك.. كنا نتشرط.. وايش من صيد نشل والا ايش؟؟ انا كان يعجبني صيد سمك الخمبقات.. شكل الحوت جميل جداً حتى قبل نزوله الى الموفى ليشوى.. سمين وملحم.. ودسم.. بس النار تذوب الدسم ولا تحرق اللحم الابيض اللزيز.. لزيز اوي. !!

الخمبقات يا حبايب مالوش زي.. 

الخمبقات.. هذا اسمه كلاب. !! ايوالله اسمه كذا.. والعهدة على الصيادين العتاولة في التسمية.. طبعاً في شبه كبير بين هذا الكلاب وبين الخمبقات.. احمر وعيونه عسلية وجلده حراشيف.. بس الطعم في الخمبقات احسن، آخر مرة شليته حوت خمبقات كان معي صديقين عزيزين.. وكانت عشوة سلطاني.. الحوت كبير وشليناهو بثمانطعشر شلن وباوله.. وساني عند علي افندي بالزعفران. !!  تحزوا كم تساوي الثمانطعشر شلن اليوم. !؟؟ خللي الباولة على جنب.. يا ايها الاعزاء محفوظي البقاء ما با تصدقوا كم كانت ذيك الفلوس تساوي في ايامنا الغبراء هذي.. با اقول لكم.. وصدقوا او لا تصدقوا.. 18•4 تساوي اليوم 36 الف ريال لعين من حق هذي الايام البطالة.. نعم انا ضعيف بالحساب.. لكن الحسبة زي ما يقول العارفون هي كدا.. وشل والا خللي. 

   لكن بصراحة بعد الخمبقات المسكوف على قولة العراقيين او الموفى زيما نقول احنا.. يعني المشوي على بسابيسنا وملح الحاج لاله.. بعده مافيش ذوق ولا طعم ولا لزازة تساوي الخمبقات.. ولا تقول لي عربي ولا جحش ولا بياض ولا غيره.. الخمبقات ياصاحبي مالوش زي