حسن أكل التفاح..!!

حسن يتسمع مسجلة بصوت عالي: العطروش يغني برع يأستعمار برع من أرض الأحرار برع ..

أبو حسن يدخل عليه الغرفة: مالك يأبني كذه تتسمع بصوت عالي المسجلة أيش أتخروعت..؟!!

حسن: يابا أنت أيش فهمك بدع بدع النضال, بانخرج أبتهم الإنجليز من بلادنا وبا نستوي أحرار..

أبو حسن: أيش من إنجليز يأهبل اللي باتخرجوهم باتموتوا جوع يا شمات قالك بانخرج الإنجليز..!!

حسن: يابا أنت أيش فهمك قد نحنا مخططين كيف با نخرج المستعمر البغيض، وباتجي على كلامي وأول مانخرجهم بايجي الخير، وبانأكل التفاح والعنب من الطاقة..

أبو حسن: كيف من الطاقة يعني..؟!! يرد حسن, يابا باتكون ممدد كذه بس ما عليك إلا تمد يدك لاعند الطاقة حق البرنده وتقطف العنب والتفاح..

أبو حسن: هاااا والله خبر سوى سوى, هيا بالله خلي لي حالي أنت والخروعة حقك لعد تقتلب لي زاجي قالك باتكلوا التفاح من الطاقة, طفي المسجلة مالك وماله ذه اللي يغني بايضرب بحريمكم..

حسن: خلاص يابا كل شي مرتب وبا نقلعهم من بلادنا الحُرة وباتشوف .. المناضلين حقنا با يحرروا البلاد والجبهة القومية هي القائد والموجه لنا.

أبو حسن: هيا أمي أمي سكه لك من ذي الخُبارة يأبني أنا أفدالك.

حسن يقلب الكاسيت وبصوت عالي يتسمع للمرشدي: أنا الشعب زلزلة عاتية .. أنا الشعب .. يخلص الكاسيت يطلع حق العطروش، برع. ياستعمار برع من أرض الأحرار برع.

أبو حسن: هيا غلقت, ثورة عاتية..!! هيا زمطي لك زمطي، شكله باقي له قليل وبا يجنن، يأبني نقص المسجلة صورتنا لك صوره مال أهلاتك مليه مو معانا مقهاية كشر نقص الصوت بلا خروعة حقك..

حسن: خلاص يابا باسيبلك البيت وباروح عند الجماعة أصحابنا معانا إجتماع مهم نخطط للتحرير والإستقلال..

أبو حسن: هيا مليح ليه حرري لك حراري، والله مابا يودي نحنا بداهية الا القنفزة الكذابة والزنط حقكم.

التاريخ: 30 نوفمبر 1967م: خروج الإنجليز من عدن وبدء الإحتفالات في عدن والناس فس الشوارع وحسن يرجع البيت فرحان ويصيح لأبوه: يابا يابا يابا ..

أبو حسن: مالك ياخي صورتنا أنت وصياحك أيش في أيش في، مالك كذه تتخروع..!!

حسن: يابا شفت كيف. مش قلت لك با نتحرر وبانخرج الإنجليز من بلادنا الحمدلله الحمدلله .. خلاص الأن بانأكل التفاح من الطاقة زيما قلتلك ياسلام يا ربون يابا أفرح وقشنن حررنا بلادنا..

أبو حسن يتفرج على وجه أبنه بإستغراب؟!! دحين أسمع يا هُبيله بلا دوخة حقك البلاد ولا فيبه عانه الخزينة فاضية والإنجليز سابوا عاركم مفلسين وأنت مفرح لي بالاستقلال حقك..

حسن: يابا معليش با نبني البلاد من الصفر من اول وجديد ورجال الثورة بايصونوها وبا نطرد الاقطاع والرجعيين وعملاء الاستعمار أصبر أنت بس ولايهمك.

مرت بضعة أشهر على يوم خروج الإنجليز من عدن، وبدأ الإقتتال بين الرفاق وأتقارحت رؤوسهم وقحطان وفيصل بالسجن مع أصحابهم بالإضافة إلى الأبن حسن.

أبو حسن يزور أبنه في السجن حاملاً كيس به تفاح: ياعسكري أجيت أزور أبني حسن ومعي كيس أشتي أهبله..!!

العسكري: هات الكيس ياحاج أنا با دخله لابنك.

أبو حسن لا لا يأبني خليه يجيلي من الطاقة يشل الكيس لأنه قال لي بعدما يخرجوا الإنجليز بانأكل التفاح من الطاقة وأنا أشتيه يأكله من الطاقة الان زيما هو كان يتمنى.

حسن: سامحنا يابا أننا ماسمعت كلامك ومشيت قُمري عليك, هبلي بالشنبل مرة ثانية لو ما أسمع كلامك ..

يرد عليه أبو حسن: يأبني قدنا قلك بطل بطل القنفزه حق وأنت عقلك منو يمسكك سكيت عليا أنا الشعب ثورة زلزلة وبرع يإستعمار .. هيا دحين كل التفاح من الطاقة حق السجن يا مليح ....

وتمر السنين ويتقاتلوا الرفاق ويتقازعوا واحد وراء الثاني ويسلموا البلاد بالأخير للطاهوش الكبير صاحب سنحان الذي يحرق الحرث والنسل ومن بعده يخربها صاحب صعطه وجرلك جر لما أنكبعنا كبعة بوري، ومكانه أصحابنا ولا يشتوا يتعلموا الدرس..!!