مستقبل اليمن بين ترامب وهنادي وبن دغر

بـ 2 مليون دولار" امريكا سابت اوكرانيا وغزة وكوريا واساطيلها وحزب الله وبيروت وحلب وحماة وارسلت سفيرها ستيفن فاجن لفتح قاعة فندق كورال لبقايا نفايات الفشل الفارون ظهر احمر من صنعاء بقيادة بن دغر لعقد ورشة عمل مدتها ساعتين بس؛ كلفت 2 مليون دولار مبلغ الـ2 مليون أكيد ايوه 2 تقرح قريح ؛ وقالوا إن السفير فاجن زكّن بنفسه على كبير الطباخين بالفندق أن البوفيه للضيوف لازم يكون مفتوح ومادريناش بعدها شي تبند أم لا المهم 

بنفس اليوم وفجر ربي -شوفوا سبحان الله الصدف - خرج المتقاعدون العسكريون -بلا قراع مفتوح وبعضهم للأمانه معاهم شاهي بقصاع - وجلسوا كل واحد بيده كيس داخله ورق فحوصات وكشافة عملها ايام البلاش بباصهيب  وبندول مفحوس وقرطاس مضاد حيوي منتهي الصلاحية التاريخ حقه اصلا امتحى المهم مالكم ومال ذي داخل لكياس .. جلسوا أمام بوابة معاشيق هم والمدرسين والتخاتر مع انهم عارفين ان معاشيق ما باقي داخلها الا العسكر وأن آخر واحد خرج من القصر قالوا العسكر أنه العليمي سمول راح اذربيجان ينقذ الكون من التغير المناخي. 

وبعد المغرب قرح القات مع فاجن وخرج راسه من طاقة كورال وقال بالعدني آووو ليش برع غدرة؟ قليل ودقوا عليه الباب وخافسوه بالأذن نعم المطار قالوا عادها ما وصلتش المهم سهل باتوصل لا تقلقوش. 

 انا كنت مخزن بغرفة بنفس الفندق عند واحد صاحبي نزل من حضرموت المهم اتصلت بواحد صاحبي بالبنك وسألته قالوا ماشي باقي معاكم بيس الا المشعطة ’"صدق" لو ماشي قل لي نتصل بالمتقاعدين يروحوا مساكين؟   

قال لا كان في بيس بس رسلوها برع .. وين ؟  القاهرة .. لمن ؟ وانا كنتوا هناك وما حد قال لي : قال اقول لك بس لا تقولش قلت له الا اقول ..  قال  لـ 5 ألف ناشطة مساكين بالغربة بعضهن هناك من قبل الحرب وفي لنج وبعضهن بأنقرة مشاهرة لكل وحده 3 ألف $  ليش طيب ما يرجعين هنا يخدمين الوطن من عدن - على قولة عادل امام " قال لا ما ينفعش ليييش قال ماشي نت " 

صح ... 

انا عندي عادي الفلوس والدولارات ومدى استفادة البلد منها والمتقاعدين ذي بعضهم روح والبعض اشتري هبش ورجع يدكي بالبوابه صابر للرجال المهم المتقاعدين صبروا 20 سنة مش مشكله لو كملوا ال 30 سنة اللي مزعلني ان الناااااشطات ابو 3000$   اللي برع   4800 منهن خيب بس. 

طبقت من عند صاحب البنك واتصلت للمطار اشتي اطمّن فاجن اول واحد  شي خبر وصلت قالوا لسسسسسه هذه المشكلة الأساسية الآن بالبلد؛ أما الكهرباء طول اعمارنا بلا كهرباء وبلا رواتب طيب فاجن باقي معه عانتين  قال لي صاحبي الحضرمي ؛ قبل ما يرفع التقرير لترامب اللي جالس يهددنا يا نخرج له الأسرى من الأنفاق يا اما يضربنا ضرب ما حد انضربه من قبل. قالوا لفاجن اسمع باقي معك جماع عجيز زميلات بن دغر والشلة كانوا بصنعاء لازم تسوي لهن بوفيه مفتوح اشمعنا بن دغر وشلته هما احسن مننا ؟  وسوي فاجن لهن ورشة لكن هل البوفيه مفتوح مدري !!!!! وسافر والحمد لله هكذا تمكن فاجن ومعازيمه من هزيمة الحوثيين  .. 

لا حد يتصل للمطار لو وصلت با نعرف بس المشكلة ان البوفيه تقفل..